Ortaq oıymyz – otyzdyqtan kóriný
Qýanysh SULTANOV,
Májilis depýtaty:
– «Qazaqstan -2050» Strategııasyn, «Nurly Jol – bolashaqqa bastar jol» Joldaýyn halyq jaqsy biledi. Osy baǵdarlamalardyń aıasynda naqty-naqty alyp jobalar da júzege asyrylýda. Al endi keshegi áleýmettik jaǵdaıǵa baılanysty aıtylǵan sózindegi eldiń ekonomıkasyn kóterý, áleýetin, rýhanılyǵyn arttyrý, turmys jaǵdaıyn kóterý baǵytyndaǵy uzaq merzimdi josparlary halyqtyń sapasyn, sanasyn kóterýdi maqsat etkeni kórinip tur. Osy sózderden keıin biz «Qazaqstan-2050» Strategııasy men «Nurly Jol» baǵdarlamasynyń maqsat-múddesin tereńirek uǵyna bastadyq. Túptep kelgende, sonyń bári Máńgilik El ıdeıasyn júzege asyrýdyń qadamdary eken.
Sonymen qatar, is-áreketterdiń sapasyn arttyrý baǵytynda eldi jańǵyrtý jónindegi komıssııa quryldy. Ulyqtaý rásimindegi sózinde Elbasy ol týraly aıtqan edi, biz ony jýyq arada quryla qoımaıtyn shyǵar desek, ol keshe jedel túrde qurylyp ta úlgerdi. Onyń tarmaqtary barynsha damyǵan elge qajetti dúnıelerdiń bárin qamtyǵan. Men komıssııa jumysynyń tıimdi bolaryna senimdimin.
Shalataı MYRZAHMETOV,
Májilis depýtaty:
– Búgin elimiz shat-shadyman bolyp Qazaqstan halqynyń birligi kúnin toılap jatyr. Birlik – bizdiń elimizdiń eń úlken maqsaty. Keshegi ulyqtaý rásimindegi sózinde de Elbasy osy sózdi aıtty. Sonymen qatar, ol ózi usynǵan bes ınstıtýttyq reformany alǵa jyljytý úshin komıssııa quratynyn da aıtqan bolatyn. Sol Ulttyq komıssııa da qurylyp, ózine júkteletin mindetterdi qabyldap aldy. Parlament palatalarynan da oǵan ókilder engizildi. Májilis Tóraǵasy Qabıbolla Jaqypov bizdi jınap alyp, komıssııanyń aldynda turǵan mindetter týraly aıtyp berdi.
Daǵdarysqa qarsy kúreste Elbasy ishki jalpy ónimdi arttyrý maqsatyn da alǵa qoıyp otyr. Osy baǵyttaǵy jumystyń belsendi júrgizilýin de komıssııa qadaǵalaıtyn bolady. Halyqtyń áleýmettik jaǵdaıyn joǵary deńgeıde ustap turý da nazardan tys qalmaıdy. Ekonomıkanyń damýy men áleýmettik jaǵdaı qaı kúnde tepe-teńdigin joǵaltpaýy kerek. Eger osy teńgerim buzylatyn bolsa, onda defolt bolýy múmkin. Sondyqtan ári ekonomıkany alǵa jyljytyp, ári halyqtyń ál-qýatyn arttyrýdy qatar alyp júrý kerek. Elbasynyń negizgi tapsyrmasy da osyǵan saıady.
О́mirzaq OZǴANBAEV,
Respýblıkalyq ardagerler uıymy Ortalyq keńesiniń tóraǵasy:
– Bıylǵy Qoı jylynyń kóktemi bizdiń halqymyzǵa toı jyly bolyp bastalyp jatyr. Kúni keshe ǵana halqymyzdyń zor belsendiliginiń arqasynda biraýyzdan saılandy dep aıtýǵa bolatyn Prezıdentimizdiń ulyqtaý rásimi bolyp ótti. Halyqpen birtutas bolǵan ardaqty uly búkilhalyqtyq qoldaýǵa ıe bolǵanyn búkil álem kózimen kórdi. Ulyqtaý rásiminde ol aldaǵy ýaqytta atqarylatyn isterdiń baǵdarlamasyn aıtyp berdi. Onyń ishinde ózi Ult jospary dep ataǵan Qazaqstandy jańǵyrtý jónindegi reformalardy aıryqsha ataýǵa bolady. Men osy reformalardy júzege asyrý úshin ózimniń barlyq kúsh-jigerimdi jumsaıtyn bolamyn, degen edi Prezıdent. Bul reformalar bizdiń elimizdi 2050 jyly barynsha damyǵan 30 memlekettiń qataryna engizetin qadamdar ekeni daýsyz.
Osy reformalardy iske asyrý úshin Prezıdent birden Ulttyq komıssııa da quryp úlgerdi. Ol birneshe salany qadaǵalaıdy. Sonyń ishinde kásibı memleket qurýǵa, onyń is-áreketteriniń móldirligine basa nazar aýdarylyp otyr. Elimizdiń erkin damýy, onyń ishinde, ındýstrııalyq-ınnovasııalyq damý baǵyttaryna da erekshe kóńil bólinetin bolady.
Borıs SOROKIN,
Májilis depýtaty:
– Merekelik kóńil-kúıim óte jaqsy dep aıtýǵa bolady. Birinshi mamyrdyń dál búgingideı jadyraǵan kúıin buryn Astanada kórgen joq edim. Bult bolmasa da yzǵar ketpeı turatyn, al búgin aıryqsha kún eken. Onyń ústine bul kún Qazaqstan halqynyń óz Kóshbasshysyn durys anyqtaǵanyna Jaratqannyń jasap jatqan syıy ma dep otyrmyn.
Memleket basshysy keshegi ulyqtaý rásiminde bárimizdiń aldymyzǵa naqty tapsyrmalar qoıdy. Sonyń ishinde jahandyq qaýip-qaterler týraly da aıtyp ótti. Olardyń bizdiń ekonomıkamyzdyń damýyna keselin tıgizetini anyq ekeni aıtyldy. Osynyń bári menińshe, óte durys aıtylǵan sózder. Bizdiń osyndaı qaterlerge qarsy turatyn basty kúshimiz – elimizdiń birligi, halqymyzdyń birtutastyǵy.
Memleketti jańǵyrtý jónindegi Ulttyq komıssııanyń jumysy aıqyn. Ol qolǵa alynǵan reformalardyń oryndalýyn qadaǵalaıdy. Menińshe, naqty isterdi qadaǵalaıtyn osyndaı naqty komıssııanyń qurylǵany durys sheshim boldy.
Jeksenbaı DÚISEBAEV,
Májilis depýtaty:
– El Prezıdentiniń janynan qurylǵan Ulttyq komıssııa buryn aıtylǵan 5 reformany kezeń-kezeńmen júzege asyrýdy basqaryp, memlekettik organdardyń, bıznes sektor men azamattyq qoǵamnyń is-áreketterin úılestiretin bolady. Elbasy Nursultan Nazarbaev ózi ótkizgen keńeste osy komıssııanyń qurylǵanyn jarııalady.
Ulttyq komıssııanyń janynan bedeldi sheteldik jáne qazaqstandyq sarapshylardan turatyn konsýltatıvtik keńes qurylatynyn da Prezıdent ulyqtaý kúngi sóılegen sózinde atap ótti. Konsýltatıvtik keńes halyqaralyq tájirıbeniń ozyq úlgilerin paıdalanýǵa yqpal etetin bolady. Menińshe, bul komıssııanyń jumysy barynsha tıimdi bolýǵa tıisti. Komıssııa qurý týraly Jarlyqta onyń negizgi baǵyttary men olardy qadaǵalaýǵa jaýapty adamdar da belgilendi. Osynyń ózi komıssııa jumysynyń naqty baǵyttaryn aıqyndap otyr. Árıne, halyq bul komıssııanyń jumysyna qoldaý bildirýi kerek, tek halyq qoldaǵanda ǵana kez kelgen is nátıjeli bolady.